المساعد الشخصي الرقمي

مشاهدة النسخة كاملة : بسرعة دخلو هذه مجموعة كبيرة من الأبوذيات


أغرقني موجها
11-19-2008, 01:39 AM
اشهالغيضه يناهي منكراهه
ابزعل لو تصد عني منكراهه
اجفون العين عينه منكراهه
وابدن ما تضوگ الوسن هيه

اشمالك يا ضعن بهواي شتيت
انه بناري اهمن بيك شتيت
اذا انت بقميص الصيف شتيت
انه مصلخ شتاك المر عليه

يمكتوبي دگل لهلي تراني
بين اجبال ذبوني تراني
شمس ماشوف بعيوني تراني
مظلم والوكت موحش عليه

يهل تنشد على حالي تراني
مريض وعندك علومي تراني
لحگني المرض من عدكم تراني
طبيبي احتار والعله خفيه

ناحل وامشي مكابر تراني
تاره الموت يدهاني تراني
واجلد من خاف عدواني تراني
واگو من يمر شامت عليه

اخوي اللي الي بسيوف والشار
ودورلي دروب الغدر والشار
الماياخذ كلام الزين والشار
اتركه ولاتمر جيد نيه

لكط ميفيد البيه بيه الغسل والشار
انه من ايدي تبعت اعداي والشار
يوم اطلك يمينه ورفع والشار
صيام البيت واجب عليه

ضيم الدهر بالدلال والجار
وچوانينه بسويد احشاي والجار
ما حن عليه الاخو والجار
وخالي تبره مني جيد نيه

نفسك دوم حاسبهه ولمهه
تره منيدك مسرتهه ولمهه
فقير الحرص عالدنيا ولمهه
وغني اليقنع برزقه بلا شجيه

چاي بورد وجناته ونومي
اشكال وتيهن فكري ونومي
خزي نركض دره المجفي ونومي
الرزج لو وياك يبره اعله الوطيه

انحلت ما بعد اشيل الجدم واخطيت
اشكثر منك حملت ذنوب وخطيت
حبيبي لو رماني بسهم وخطيت
اظن من حرمله ماخذ هديه

اخوك شماعمل وياك حيه
اكرمه ولاتدور عليه حيه
اذا عاف اللبن وانگلب حيه
الزمن عگرب يلدغه القاط ميه

انا العالي اذا گالوا على خو
وانا الما فضلت نفسي على خو
وانا ارتاح بس عيني على خو
اذا مهموم همه يصير بيه

سودني هواك وهمت بلهام
وعلى فراگك گضيت العمر بلهام
طفل والبست راس الشيب بلهام
وصرت عجبه المثل ينضرب بيه

الك من دون كل الخلك وديت
بعتب للي يعرف العتب وديت
علامك يا جرح خزنت وديت
على الشح بالوصال وخان بيه

من مثلي رماه الدهر ورداه
الغصن يذبل يرد ايعود ورداه
عسل بالذل انا مهواه ورداه
الشري بالعز اله روحي شهيه

دنيف متيمك ما يوم بسم
مغيني يساهي العين بسم
من وچدك غديت الظم بسم
ابد سيم الخياط يضيع بيه

غرامك عود الروحي بها خال
وچبدتي سهم للعاذل بها خال
بوجنته ركب الباري بها خال
الحسن خده والتعذيب اليه

رماني بسهم لاقدم لاخر
بچبدتي ولانزف دمي ولاخر
مثل العبرت واحد والاخر
حارت بينه وبينه المنيه

العشره وياك ردت تطول لاباس
وانت من ثياب الفخر لاباس
وصلك لو كطعته بسبب لاباس
اذا خلك غبي وذاته رديه

الدنيا بس علي بالضيم نابت
شلت عگلي وعضاي بيوم نابت
الك بسمار تحت الضلع نابت
شلعته وزال ضيمي شعمل بيه

علامك لا ومي ردك ولا نده
جفيت ولا عرگ وجهك ولنده
عرفت البلهند ساكن ولنده
وانه جارك تضيع العرف بيه

ابچاي عليك خل دمعي تمشه
واحب شي شوفتك يمي تمشه ( تم الشيء )
حبيبي مروتك گبالي تمشه
وارد اشوف شلون ما تزهي الوطيه

وحك من صورك يا ترف وصفاك
و فلا يحصل بحور العين وصفاك
الكلام يشيع من ينباح وصفاك ( وصي فاك )
يكتم عن عذولك كل خفيه

يهل لابس الوبري عالفراگ
عزيز وگاصد البيده عالفراگ
بريت الاسس الفرگه عالفراگ
غريج ولا يحن گلبه عليه

انه واحد والي عدوان مايه
والي ناذر يكت الدمع مايه
اذا باچر حبيبي الصبح مايه
العصر ما يلحگ الكاين عليه

وحگ التين والزيتون والمن
جروحي طابن وبجفاك ولمن
اريد اخبط دموع العين والمن
بالابيض لو طره ذچرك عليه

يصاحب هاي دنيانه تراهي
مظلمه والوكت ازهر تراهي
الزلم للتجربه انخلقت تراهي
لو جار الوكت جارو عليه

چم بطران يحجي علي ويلوم
وبعد هيهات جرحي يطيب ويلم
مايدرون مات الابو ويلُم
يتيم اصبحت ما عندي تچيه

الدهر توه نبت بحشاي خله
يشيال النعش بالله عليك خله
رمى ابن امي بسهم خله
خيِ وارد اشيلنه بديه

شدگ شلطم شنوحن شبچي انه
او على الغرب ضعنهم شبچي انه ( شبك اليد )
سالت دموع العين شبچي انه
تگول بدم على الفارگ خويه

عليك الليل اسهرنه وحيه
وعلي لا تكض مستمسك وحيه
شلي برفجة العگرب وحيه
تلدغني وتوسدني المنيه

خلاني زماني بطرك خلگاي
نوبه افتره نوبه يضيگ خلگاي
لخاطر حاجتي فضيت خلگايي
انتچيت على الرمح غصبن عليه

تعال انصب يجاسم ماتم النه
على الوياه ليله ماتم النه
لون الرجل يدرك ماتمنه
فلا ضلت بعد عله خفيه

هلا بالضعن واهل الضعن والشاة
ولاتاخذ حچي النمام والشاة (الوشاة)
انت الالفيت الذيب والشاة
الذنب ذنبك عليش تلوم بيه

الدهر بس البراسه جنون يمنه ( يأمن به )
غدر بيه وبجار الچان يمنه
ما تنتصر يسره بغير يمنه
ولا يمنه وحدهه تفل قضيه

امشي بلا عگل تايه شمالي
ويميني گمت احسبنه شمالي
لا شرجي واعذرنك شمالي
شمالك يا عكل شتيت بيه

هالعشره يلاهي دمهه لينا
وعليها من البيارق دمهه لينا
على هونچ يدنيا دمهلينا
مدام اضعونه انطبگن سويه

اهنا يلي حسبت تجفي ونسلاك
خلافك ولك ما ترهم ونسلاك
اچان انت مضه عيدك ونسلاك
مثل يوم الطبك عيدي عليه

انه العذبت روحي منيداي
وتهت ما وچد الجبله منيداي ( الجدي )
سوء الصابني كله منيداي
حشه الايام تعمل سوء اليه

انه من اسمع صياحك مناداك
ونيني كل جبل فسر مناداك
اثاري الجاري بحالك مناداك
وتگول ازره زماني وخان بيه

من مثلي مداد الدهر مداه
ومن مثلي جفونه اتهمل مداه
اخوي الچنت منصف بيه مداه
انصافه ولا عمل معروف اليه

مبارك من شفت خلك وشافك
اضن حييت اله بگلبك وشافك
حرت انه بحبل ودكم وشافك
وشيعه وراسهه ضايع عليه

الصبا گوطر ولا ينفع نداماي
تضن هم ينفع الضامي نداماي
اخبرك سكنوا الغبره نداماي
اشبگه عندي وبعد تنشد عليه

تسعر لالهب ناري ولدواي
اسجل لاقلم عندي ولدواي
يكول الله كل داء وله دواي
دوه داء الكبر ضايع عليه

اجي عيني لطريجك بامل يربه
صصديجك لو مشيت وياه يربه
يتيم وعد شريچه تضن يربه
تكفخه وطفرت دموعه سويه

همت وتوهمت روحي بهاماي
بهيمه وجربتي مامش بهاماي
بعد شتفيد عضاتي بهاماي
خل اشمايصير يصير بيه

بهيده الناس طيحته وناداي
ادك والطم وره حبابي وناداي
ادين الناس تتشابج وناداي
افلتن وچلبن بصاحب اليه

من مثلي وكف للسير يمله
ومن مثلي الدمع غدران يمله
انه البعت للخوان يمله
وهم عيب اعملوا معروف اليه

عليك اتحزميت حزام واشكال
اشكثر مني خذيت اذنوب واشكال
صديجي مايكول الشرف واشكال
محرم بالغسل يوكف عليه

جروح الدهر المهن وداهن
وگمت انطلب للحكمه وداهن
ابد ما اخضع لدوني وداهن
واگل للذيب نغماتك شجيه

الدهر محد عرف مكره وداره
دور وين المخير وداره
السبع گام وغلگ بابه وداره
وابو الحصين ينكح بالثنيه

عسى من المرض ياخوي شافاك
مارفن بغير الطيب شافاك
انت وما گضيت وياه شافاك
جا انه يخوي شلون بيه

كل مصباح اباري الدرب وانضر
واصد عيون عنك دوم وانضر
وحدي وراح اشيل الحمل وانضر
واشوف العاقبه شتكون اليه

لمن يا عين ليلتي وسلتي
راح الچان الي منوه وسلتي
غزوني وفرهدوا عنبي وسلتي
وذبو چتلة الناطور بيه

هواك بظامرك مچمن وعن بيك
بگت وعيون عذالك وعن بيك
لهذا فرهدوا سلتك وعنبيك
وتضل مطلوب للناطور ديه

كتابك من تكتبه طروش عن بيه
الم گلبي تضن ينزال عن بيه
اخبرنك يصاحب راح عنبي
انجتل ناطورنه شلون بيه

لمن نشكي مصائبنه وهمنه
عفنه الدار وصاحب وهمنه
ندنگ روسنه وسفه وهمنه
لناس انذال مابيهم حميه

عاشرت الذيابه بغاب والهم
ركد حيلي بكثر السگم والهم
بيدي گمت ادك الصبر والهم
على الشح بالوصال وخان بيه

بيدر لا تضن عندي ولاهام
اخوتي للعدى بين ولاهام
بيهم بعد لا انشد ولاهام
مدام امشي عدل فوك الوطيه

النواظر دمع شبه السيل يارت
مثل الفاگده وبالنوح يارت
عداوه الهه الليالي اوياي يارت
طشت شمل خلاني من اديه

يگلبي انوب حاربهم وعدهم
وعلى اللي واعدوا خانو وعدهم
جثير اصحاب چانولي وعدهم
ولعد النايبه شحوا عليه

سره ضعن الاوده بليل مارد
ودمعي صار للعريان مارد
خل يفرح الشامت جيف مارد
مرامه واليريده صار بيه

بسك لاتعذب الروح ياهم
انحلت والشوف عندي صار ياهم
وين التستهر الخلات ياهم
ارحلوا وديارهم ضلت خليه

جبح ما يفتهم وميه وشاره
يفل مني ولگه الواشي وشاره
اله گبابن حدر زيجه وشاره
الحلف واچلب يودي المنيه

اصيح عليك بسمك ماتچنه
عسى ربي عليكم ماتچنه
اخوي المانفعني مات چنه
ولا گولن اخو بعربان اليه

تلملم عليه الغيم والضب
الجاهل ما يفيده الضبط والضب
وطحت مابين غار السبع والضب
بالاسفل عگربه وبالباب حيه

جبت غوجه عليه اللكد حامي ولغ بيه
لاجلك والهوى مغرم ولغ بي
حسافه انچهب ماعونك ولغ بيه
نگس واحرم بعد شربه عليه

اهروش انياب هجرانك لچنها
وروحي اطلعت ما ترجع لچنها
عزيزه وغاليه روحي لچنا
ارخصنها بحين شح وصلك عليه
عبد منخي

گصه بيه وكتنه ماصفنه
وابيه نفوس عدنا ماصفنه
دوم احنا التواضع ماصفنه
بعكس ضيج الليالي اعله الحميه

مثل ريم الفلا لو مشى يختال
كلف من اصد ليه العگل يختال
ارموشه سيوف بيهن دوم يختال
فتگ والله بسويده وعمل بيه

ابد ليلي صار حفنه سنين يلهام
ومن هجرك دليلي الصبر يلهام
مو كاف بعد شتريد يلهام
خذت روحي عساك وخنت بيه

اظن دهري گبل دهري تحنه
وحنيني الفاگد الطفله تحنه
كلمن فرح دولابه تحنه
وانه بفيض الدمع حنيت اديه

ابركت لاشيل ينفعا ولاير
ولاخل اليناديني ولايار
الدهر منعول من يجفي ولايار
يبدل زينته بشينه عليه

اشكثر جر بالدهر شفته وبي عار
الدوني لو طراله شوسعه وبي عار
چم دوني ونغل طبعه وبي عار
زهاله الوكت وانحط شفيه

انحلت ماي الزم نوكي ولحدي
بهيمه ولاعرف الحدهم ولحدي
ردت عاذل يخط كبري ولحدي
وشامت مبتسم جناز بيه

ابركت لاداء ينفعا ولا حاي
بلحن زندي اعلف الدنيا ولا حاي
انه لا ميت خلتني ولا حاي
مريض ولاهي يسكن الالم بيه

انه بگومي غريب اصبحت يالاه
ولعب بيه الزمان الشوم يالاه
تنشدني دليلك طاب يالاه
يخي ماطاب كثرت الالام بيه

سنه درويش عباد وسنه اشاه
وسنه الطير اللگه وكره وسنه اشاه
سنه متغطي ودافي وسنه اشاه
وسنه لنه الجحيل يصب عليه

ابيه نفوس عدنا من يهلنا
وسام الشرف سابج من يهلنه
اله حگ اليهلنه من يهلنه
يهل نفسه وتواطه اعله الرديه

دمع عيني اعتقد بجفاك وشل
ويه جرحي ما يفيد ضماد وشل
لون عضاي كلهه تموت وشل
اظل اهواك لاخر نفس بيه

يصاحب غير شخصك ماسبينا
وطبعنا لليسبنه ماسبينا
لفت منك حچايه ماسه بينا
لچن عكك نفوس اللنه ابيه

رسايل شوگ ولفي من تلاها
وعذرك چان عنه من تلاها
وذنتك يصاحب من تلاها
اشگلت وشگالك واشگلت بيه

ثلث بتوت مني گطعت خلتاك
وبيهن ياجبح چنت اسد خلتاك
مشيت وياك هم فد يوم خلتاك
واحد يمن عليك ومن عليه
محمد علي چلاب

الك جان الفخر معنى والك باس
وحب الوفه من اطباعك ولك باس
عرفتك هذا حد ودي والك باس
لا انشد ولا تنشد عليه

عجزت من كثر ما ميزك وگلبك
ولن الوفه شح مني وگلبك
كلبي ابيض بشوكك وگلبك
ظهرلي وياي مو عن حسن نيه

وحگ حيدر امير النحر والجان
من لحظه السواد احشاي والجن
اسهام الهجر والنيران وجن
بدليلي وما دريت الصار بيه

تبي تطلع يخي روحي وردها
الحگ الها رجع ظالم وردها
گبل جان نزل يزهي وردها
ذبل والمادراش يلوم بيه

گبل ما تعتني يا ترف يسراي
وتجنب لا تشيع الخلگ يسراي
لو شفت النذل بالضعن يسراي
ابتعد بالك تسويله رديه

ردت وياك خويه تدوم لاباس
ودوم انت لثياب الفخر لاباس
وصلك لو گطعته بسبب لاباس
اذا خلك غبي وذاته رديه

دليلي الچان بي بتين سابات
بد روحي بهواكم دوم سابات
اشچم مره سمعت يا صاح سابات
منك وانه المسبه تحرم عليه

شجاك وياي هيج اديت يرحين
ورتبتك بالكلب خلفت يرحين
گضيت وياك حفنه سنين يرحين
مثل ماي التبده على الوطيه

شجاك الزين ويه الشين خاويت
نحل جسمي ودليلي عليك خاويت
تركت الناس كلهه والك خاويت
جبتك للوجود وخنت بيه

روحي مفلحطه وشبعان شعواط
و من ناري المعطبه تشم شعواط
من كطمه شردت ولكيت شعواط
وانه مشعوط ولا عايز اذيه
ابو رافد

دوم الدوم احاميلك ولك سور
وازامط بيك عيب اطي ولاكسور ( لا اكسر بيه )
طبييخك ضاگته الوادم ولكسور
شمالك حرمت ضوكه عليه

دوم الدوم اجل شخصك والعظام
الك من سابج بكلبي ولع ظام
ابن مرجان اكل حكك والعظام
كدهه ولا عظم خلاه اليه
عبد علي زياره

خلني چابده بالبطن درداي ( علتي )
وزماني عگب در الطيب در داي ( المرض )
تخبرهن ظروس الچلب درداي
اشيكد العظم يبن زياره ليه
عبد الواحد الهلالي
بلسان جبار مرجان

يكفيني من همومي هملكم
عظيم وتظن گلبي هملكم
احبابي بعد رجعه هم الكم
تعودون ويعود الفرح ليه
ريسان الحچيمي - ناصريه
ابو الطيب بزمانه من يعاني
ومثل روحي بعذابي من يعاني
لمن تبچين بسچ من يعاني
من يسوه البچي ويسوه الاذيه
نفسه
دوى چانونچن يابيض واكبر
بدليلي وگمت اصيح الله واكبر
اخاف يصير بيه الشيب واكبر
تمرن ما تسلمش عليه
حدى حادي الرجايب وانحبلها
واشوف ارسوم دارك وانحبلها
الموده وين صارت وانحبلها
انگطع لو ارتجي تعودون اليه
علي موسى حشيش - شطره
الرجايب غير مبغض ماحدلها
الليل اويا حسرتي ماحدلها
بگت روحي تعالج ماحدلها
اليباريها وينگط الماي اليه
عبد الواحد الهلالي - شطره جواب البيت السابق
اخوي العاف رايه وتبع مرته
حلوه ماضكت بس شفت مرته
شلي بجيته مااريد مرته
امحرم بالغسل يوكف عليه
عود السوس اشربته شلي بي
يريد لمهجتي يشلها شلي بي
اخوي الماحضر يومي شلي بي
شلي بذبت ترابه عليه
وينه اللي ينشف الدمع منسال
التأسف ما يفيد الجسد منسال
الشامت رقه وياه منسال
عسه يگولوله احوالي رديه
هاشم فليح
مظل واحد ينشف الدمع منسال
ودهرك دوم سيفه عليك منسال
خل صبرك صبر ايوب منسال
ارتجه ربه اوشفه من كل اذيه
السوك
شبه طير الگطه الظامي علاماي
امر ولا ارى منهم علاماي
ابهاي الدار اهل ودي علاماي
شحده بيهم گمت اصيح بلا وعيه
يعبد العال لا تنفش بهاماك
تمكن واضربك دهرك بهاماك
تحسب الناس كلتهم بهاماك
يعله البيه بيك والبيك بيه
عبد الحسين حميدي - شطره
صفگني الدهر بچفوفه بهاماي
طفه عيني ولا خله بهامي
ومدام اهلي فلا همو بهاماي
متى گلب الغريب يحن عليه
عبد العال - شطره
يدنيا ابوچ لابو اللي يمن بيچ
بسبب لن العمر صارن يمن بيچ
جم ساگط على الطيب يمن بيچ
الربيع ايسوي الهزله عضيه
حرت مدري شجبر ششد شدهان
چثيرات وعليه صعب شدهان
شادهني زماني اشلون شدهان
افراگك والشمات تحيط بيه
عبد الحسين حميدي
دلالي گظه من الدنيا وعدها
بأذاها فرح شامتها وعدها
انا اشما ارد اهملها وعدها
تململ بگت بفراش المنيه
هلبت عاتبت نفسك ولاميت
ابحبل هواك ساجني ولاميت
لاني بالحياة حي ولاميت
حي انحيل يادوب النفس بيه
يگلبي اتفسر المرمر ونهلاك
سهو كثر الحزن هكك ونهلاك
يجون اليوم لو نشدوا ونهلاك
شگول اطروش لو حدر الوطيه
عجب للحين عندي عيوني يارن
مابطل دمعهن دوم يارن
يعين الله دليلي حمل يارن
الدهر واطبگ جفه احبابي عليه
ناحل وامشي امكابر وعاني
نايم والوكت توه وعاني
بان الخلل باثنيني وعاني
واصحه من يمر شامت عليه
العواذل شنت ابحالي وناميت
الوسن ماطب جفن عيني وناميت
تراني الناس حي امشي وناميت
لچن ثوب الصبر ساتر عليه
انحلت ما بعد اشيل الجدم ويراح
عليك اذبل لب الگلب ويراح
تنام انت حبيبي ابفرح ويراح
وانه ليلي عذاب يمر عليه
طول الليل اعگبه بسمني
ولاساعه الليالي بسمني
شلك عندي يدهري بسمني
مرامك والتريده صار بيه
طحت لا مال يجعدني ولبني
بعد ماعمر بيتي ولبني
اخوي الرضع ديس امي ولبني
مالح مايجد الوصل ليه
نشف خنياب شطي ماتجاره
وعليل اسدت مصايب ما تجاره
طلبتي من الاهي ما تجاره
لچن ماريد شامت يحس بيه
نياب الدهر عظتني ولاجن
ابهيمه او لاذره بيه ولاجن
انه راضي بقسمت الباري ولاجن
اره غيري وتشب نيران بيه
ثلاثه بالدجى سارن ولاجن
ولاهن من نسل ادم ولاجن
لازاغن ولا راحن ولاجن
ولاجتهن من الهاتف نديه
گلي اشبلاك ياجفن ونداك
وغدو ومايسمعون ابچاك ونداك
لون همي بجبل چا صاح ونداك
تشظه وكل كتر صار بزويه
لسل سيف الهجر بهواك واحد
يواحد ما دره بهموم واحد
والناس تبني ولها هدام واحد
وانه ابني والف هدام اليه
عبد الامير الفتلاوي
يلوم اليمت بجفاك لو سال
وبعد منه الينشف الدمع لو سال
ولا تشكي العدوك ضيم لو سال
ترى نار الشماته اوجرت بيه
ياحبل المسك روحي ويابت
ويامسكن يلفيني ويابت
عند الناس مكروهه ويابت
بنت وافعالها كلهن رديه
اون لليل الهنادس من سهلهه
حرت ما وچد الوعره من سهلهه
انه والله الموده من سهلهه
لحيث يچلچل المظلم عليه
اشيعن من مرار الدهر يگلب
وعلي فلك الزمان اشلون يگلب
الكواسي اغطست والرفش يگلب
وشفت عگروك يعلس راس حيه
الاحواز
اون وموش وني بطرب وانعال
ومن ناري اسب الروح وانعال
الدنيا ارفعت كالات وانعال
ابن عنكوش وشحيم سويه
عبد الزهره - شطره
انشدك عن هذني ابكار يوكار
ابكار اهل الهوى يوگار يوكار
اطب الكار بهل الكار يوكار
انه بكارك وانته مالك كار بيه
بريج الجان اله بلجان يلجان
على شانك لكسر الجان بلجان
ان جان الجان اله يلجان يلجان
خياري من بنات الحور هيه
بترمه وصافنات الرمص يالن
اصايل وبثناي اعداي يالن
وياليت الليالي تعود يالن
وسط گومي وعمامي هيبه اليه
يدنيا اشمال دولابچ يناحاي
ومن الكترين كسرتي يناحاي
چنت شبوط بالجاري يناحاي
اشلهت وارتزت الفالات بيه
وحك زينب ووالدها وجدها
ونار الدهم بضلوعي وجدها
عميت ومندل دروبي وجدها
هذا اللي جره يسلام بيه
ييمه بداركم خلو علامه
وبچيت شما بچه الياهل علامه
يهلنه جاركم شالو علامه
نصيبي لو سمع منكم رديه
محافل ما تسليني وملهه
روحي انگطع كل ضنها وملهه
صرت مثل اليجيب ايده وملهه
بنار الغضى وصاح اشلون بيه
تلوب الروح عيب ادري شملها
تون ولا فرح ساعه شملها
متى يلتم بعد فرگه شملها
وتعود ايامها الچانت زهيه
الدهر من يوم المفارك شملنه
جفانه وجنه ما يدري شملنه
المصايب شتت منه شملنه
بعذر بعض وبعض تحت الوطيه
حرت شكتب لكم يحباب شملاي
غدت ما توصل اليمناي شملاي
معاكم لو رفگ بالسير شملاي
يخوتي اول شبابي يعود اليه
دهن للسير مامش ودهن النه
كلفات النوايب ودهن النه
اچان اهموم عندك ودهن النه
نتحملهن سفينتنه رهيه
بديت وما عرفت شلون بدواي
طحت واحتارت الحداي بدواي
بطلت الثقافه وصرت بدواي
انازلهم حتى يحنون اليه
الدهر مرات لمنه ومرضعنه
وخذه ابن امي وعليه مرضعنه
ذكرنه بديس امي مرضعنه
وغدت بالگلب دمعاتك سجيه
اسنونك بيض شبه الوفر بيهن
وسواليفك ابگلبي وفربيهن
لون جنحان عندي وفربيهن
لجيك بساعة التطري عليه
علي لطمي يوالدتي وناحي
ونخيت الحاظر الشده وناحي
لا تفرح يهالشامت وناحي
افرح لو سره الجناز بيه
تعد نفسك من اهل الشرف واعيان
لگينه بكهرباتك صدع واعيان
حكيم انت على ذنب الناس واعيان
ذنب نفسك عليه تعمل تقيه
يشامت حني رجلينك ودينك
طحت واشتاف مطلوبك ودينك
وحك اهل القسم خمسه ودينك
انوب اشمتك واجب عليه
جيت غوجي عليه للكد حامي
وچووني البيض چويه رماح حامي
چذب ناطورهن لو گال حامي
يهذرن لو يصير الحرس ميه
النسا ملهن عهد ثابت ولحيه
چم شارب يكضه ولحيه
چم حيد النكس منهن ولحيه
وچم شارب ذبنه برديه
سالم خصاف الزرگاني
چثير من النسا الخاين ذكرهن
بكلامه للنبي الله ذكرهن
ملهن وفه دع عنك ذكرهن
عهدهن والهوى صاير سويه
من يگدر يفسر الگلب ونته
الساگط چان عدنه صعد ونته
دنائة نفس عند الچلب وانته
اخس وانگس ولا عندك حميه
ملا شري الزرگاني / ذي قار
لبس حلو الوبار ونسل وافرگ
تبسم والسنون ازغار وافرگ
ضعنه من ضعنكم شال وافرگ
بعد هيهات جمعتنه سويه
حبيبي من تصب الچاي حله
ومن تگعد ازرار الثوب حله
يا حيف اليعاشر غير حله
وانه حلي وبعد ويخون بيه
اعد الليل منطر بعد منطار
وما تدري بصميم الگلب منطار
شفت خده عبالي الفجر منطار
گمت صليت من غصبن عليه
حبيبي من وره الشباچ شفته
وتشبه لمعة الياقوت شفته
الدبيب اختلط ويه الزاد شفته
رفعت ايدي ولون روحي شهيه
گظت والله كظاهه الطيب وگفت
ولا رجلي على الانذال وگفت
نخيت اللي بحضرته الناس وگفت
يسيرها ويخليهه سعيه
وحك سورة بره وياسين ويهود
وكلبي ما ينام الليل ويهود
وصارت رادتي عد كفر ويهود
لون اسلام چا حنو عليه
انشدك عن ثلاثه باسم واحد
يواحد ما دراش بضيم واحد
واحد بالسما وبالارض واحد
و واحد غاد من تدنه المنيه
ايور وتدري منك سبب يوراي
وادري اخدود عندك ورد يوراي
انه الماخلفتلك شور يوراي
عجب مثل الطفل تلعب عليه
يبس غصني وبگيت ارسوم بسعود
وبعدك لا تضن العمر بسعود
ابزعل يكفي اتدلل علي بسعود
السعاده اتعود بس اتعود اليه
عجب حيَنه يغالي ما تمره
وبطيب الزاد عندك ما تمره
عشگ مجنون لاچن مات مره
وانه بكل يوم ست موتات اليه
نوحي ما گصد غيرك وخصله
طبع مكروه ما عندك وخصله
لشگ ثوبي الف خصله وخصله
وعلى صدري ادگ بثنين اديه
هجر وابعد علينا شيبنه
وبعد شوگ التوده شيبنه
شباب احنا وهالمصايب شيبنه
البشر شيصير لو كل ساع اذيه
اشچم ضيغم جفاه الدهر وانذال
وريج من العطش مطروح وانذال
ابذله عاش الاشراف وانذال
غذاهه المن والسلوى الهنيه
جد بهواك لليهواه وعره
او عمن چي عشرتي اوياك وعره
بعد مالي معك بشظاظ وعره
الكل منه تشح وانكر خويه
تلگه البيض يا سيد وحيهن
او عليه من السما نازل وحيهن
ابتليت انه بهوى زهره وحيهن
يسيد گوم وانصبلي عزيه
الدهر دولاب حگاني بچالاي
وكلمن نظر عد حالي بچالاي
صرت شجره يبو معيشي بچالاي
الهوه اشما يهزه اتهيل بيه
محمد البغدادي
الدهر والظلم حگاني بچالاي
وحتى البلمهد يرضع بچالاي
اچان انته اصبحت شجره بچالاي
انه الچالي ومصد الروي بيه
ابو معيشي
طحت ابمرض لاچن داي ديداي
وشالتني الايادي وطحت ديداي
هويت السمر وانه طفل ديداي
بنساة امي وهواهن عم عليه
حجي سعود
عودي يا ليالي الفرح عودي
انه عنبر وطيب النبت عودي
هويت السمر وانه بظهر عودي
بملاچ امي وهواهن عم عليه
ابو معيشي
حمام الدوح نادمني وندمه
اهو هلت دمع عينه وندمه
هضيمه ارحل عن رياضي وندمه
الزرع زرعي ويحصده ابن الرديه
حمدي الحمدي
شبه تفاح نهدينه ونوماي
تتبعنه وصحت بصياحي ونوماي
ردت وياه گعدتنه ونوماي
منام اهل الكهف نطبگ سويه
ابو معيشي
عليمن يا جدم ريضت شتن
جفوا واضعونهم بالليل شتن
ثلاثه بشديد الصيف شتن
احترگن من زفير الصار بيه
شاهت طيرتي وذكرت وكرهه
وروحي المر اشربها وكرهه
الواشي اشگد اضدنه وكرهه
چي ياخذ حچي ويجيب اليه
وحياتك لاني من وشرك وصنفاك
تادب من تمازحني وصنفاك
العتب عالصعدك بايه وصنفاك
جبل لو صرت ما تعله عليه
عفا روحي شكثر حسرات لاگت
بغيابك يالدعيت الگلب لاگات
انوحن والنياح اعليك لاگت
بسبب ما خلفت مكروه اليه
دفگ دمعي على الوجنات ياحيف
وعلى ارجال الكلايف صحت يا حيف
انه الچنت اخوف خفت يا حيف
لذت بالچانو يلوذون بيه


احباب بهالوكت مامش وفه الهه
وعلي بهامها ترمي وفلها ( الفلي )
اعتني عنوه لطلايبهم وفلهه
وهم بطلابتي يشمتون بيه
ابو رافد

بدموع اعيونه اليابس طرينه
او طر بگلوبنه لفگدك طرينه
اذا مرت مجالسنه طرينه
ذجرك ننحب وننصب عزيه
ابو رافد في رثاء عبد علي زياره

العروبه انت يبو اليمه فحلهه
ثنيتك هيل بالجنه فحلهه
اخبرك حاجتي صعبه فحلهه
يمن روحي فدوتك حن عليه

وحگ دين النبي وحسين وابناه
اليشره الشوگ لاهل البيت وابناه
يضل دين النبي معمور وابناه
بدم حسين يوم الغابريه

نزلت بديرة الغربه وضعنه
وطحنه بناس ما تعرف وضعنه
نخيت الحامل اطفاله وضعنه
يفكني من المصاب الصار بيه

ذنبك بيش اعده بالف يولك
اشوف الحگ الي ياعنز يو لك
اكل يا عنز والدباغ يولك
يطلع شما اكلت طيبه رديه

ضعن ولفي سره وگوطر وناحاي
بعيد وماسمع وني وناحاي
مدام الوكت دافني وناحاي
اخافن ليش بعد من المنيه

لو ضحكه تجي من الوكت لوحه
الكمر يصعب على البالكاع لوحه
ولك لو تدري عليك اصبحت لوحه
تدگ بسمار جاي انوب بيه

يروحي شفاد ملحچ من ملحتي
وچم ماصخ بماصخ من ملحتي
كل الجره والصار من ملحتي
مستاهل تراه وحيل بيه

عليك الوكت بويه مرمراني
وعلى كل باب شامت مرمراني
گمت ماخاف وكتي مرمراني
علچ حطني وگام يلوچ بيه

حبيبي ارجوك هالموضوع فضه
وخلگك بالحچي وياي فضه
معقوله ابدل الذهب فضه
انه بروحي شريتك وانت تدري بيه

اتمنى دوم انا يمك ويارك
ويشوفك كل وكت كلبي ويارك
اذاني تره حيل بعدك ويارك
عزيز ويصعب فراكك عليه

رحل واحنا عرفنا النزل شطره
على بالك شني اللي جره شطره
عندك يريد الگلب شطره
واضن شطر اللي عندي راد اخيه

اموت ولا عليه بضيج وشراك
وانه بروحي ابدل جفاك واشراك
اذا انساك مثل الكفر واشراك
اخوي وصاحبي وگلبه عليه

يلايم لا تلوم الروح بسعاد
شفت ناس بظليمه وناس بسعاد
يهالتبچي بتالي الليل بسعاد
تذكرني بحبيبي يحن عليه

يحلوه زعلچ طول صاحبينه
وبهجرچ ماضل عظم صاحي بينه
چنه برضه چانت صحه بينه
زعلتي وزعلت الصحه عليه



عجبتكم

مهند الهاشمي
11-19-2008, 03:06 AM
ينقل الى قسم الابوذيه ويثبت عاشت ايدك اخوي العزيز

فراشه الرافدين
11-19-2008, 06:52 PM
عاشت الاياااااااااااااااااااااادي يسلمووووووووووووووو
روعهههههه والله

محمد خانقيني
11-21-2008, 06:23 PM
اشكرك حبي على مرورك وعلى كلمات
تقبل مروري
اخوك محمد خانقيني

الشاعرسيفـے العباديـے
11-26-2008, 09:55 PM
منقول مميز وعاشت ايدك

دندونة
11-28-2008, 06:27 PM
عاشت ايدك نقل مميز

الشاعر حيدر الحسني
11-29-2008, 01:18 PM
شكرن حبيبي الغالي

لواء كريم
12-05-2008, 04:07 AM
عاشت ايدك يا ورد تسلم كلهن حلوات يسلملي ذوقك تقبل مروري

ثائر الكناري
12-05-2008, 04:18 PM
عاشت الااديادي
ومهند ليش ما مثبتهن
تثبت الابو ذيات لجماليتهن

وردة الخريف
12-30-2008, 07:16 PM
عاشت ايدك ابوذيات روووووووووووووووووووووووعة
تقبل مروري